(أشتوت)
جنّ الغرام مسّنى عيشتى بقت زيطه
حبسونى فوق السطوح وقزحت م الحيطه
دجّال وقاسْلى الأترْ قال ابنكم مهْووس
لهفْ من أمىّ الفلوس وعملىّ تحويطه
,,,,,
هرانى يومها البعيد م الضرب بالنبّوت
طلق علينا البخور ونده على ألأشتوت
وقال هاتوله العسل منقوع فى قشر البصل
ياتلحقوه بالعَجًلْ ياتكون نهايته الموت
,,,,,
سمعت أمىّ بتدعى ع اللىّ ظالمنى
وتقول له ارقى الولد خايفه يضيع منىّ
نظر بطرف العين وقال عايز ألفين
دا الجن بعد يومين راح ينتقم منىّ
,,,,,,
قالت ضفايرى وخلخالى داعقلى طار
وخدْ حلقى ورسمالى وطفىّ النار
وحيات ولادك ياسيدنا الشيخ ماتسيـبنى
أنا عايزه ابنى ولو حكمت حابيع الدّار
,,,,,,
صعبت عليّه قوى ولقيتها محتارة
وتقول دا كان فهلوى ونبيه ياخسارة
حصْوه ف عين الحسّاد اللىّ افتروا ع الواد
يحْرم عليّه الزاد والعيشه فى الحارة
,,,,,,,,
قولتلها يامّه الغرام خيطـُه بلون توبى
نسّانى طعم المنام والحب مكتوبى
وحبايبى لمّا اكتمل شبكوه فى طرف الأمل
ومعلــّقينه ف عمل على قلب محبوبى
,,,,,,
دوايا عند الحبيب وغلبت أحايل فيه
سايق عليه النصيب بيـبخـّره ويرقيه
والقلب لمّا يميل يفضل تملىّ عليل
ويحب سهر الليل والفكر يلعب بيه
,,,,,,
سحرنى رمْش العين واللمس دوّبنى
والورد فىالخدّين من حسْنه غلــّبنى
يامكدّبين الخبر يشهد عليّه القمر
عذّبنى طول السّهر والحب شيّـبنى
,,,,,,,
لو كان حبيبى ينظــّم ضغط موّالى
يرفعلى درجة حرارة حبّنا الغالى
وبوصفةالعشـّاق اشرب عصيرأشواق
حاتلاقوا قلبى راق والصحّه راجعالى
,,,,,,,,
دايب فى حب الوطن بسْ الوطن باعنى
سايبنى انده عليه مش راضى يسمعنى
دانا ابنه برضه ياهوه وباحارب اللىّ باعوه
لا رحمنى لمّا باتوه ولاحضنه بيساعنى
,,,,,,,,,
محتاج حجاب النبى يوم وقفته بعرفات
بالعربى والاجنبى منشور علىالصفحات
خطبة وداعه اللىّ مضمونها حقوق الناس
فيها الأساس اللىّ بيصحىّ الضمير لوْ مات
ليست هناك تعليقات:
إرسال تعليق
اذا اعجبك الموضوع فضلا وليس امرا اترك تعليقك لتشجيعنا على الاستمرار
ملحوظة: يمكن لأعضاء المدونة فقط إرسال تعليق.